Ketua KIM Rancakalong: Antara Kamera, Informasi, jeung Panci Dapur
Di Rancakalong, aya hiji tokoh anu unggal poéna teu kungsi bosen lumpat ti hiji peran ka peran séjén. Anjeunna téh Ketua KIM Rancakalong — sosok anu henteu ngan saukur pinter nyebarkeun informasi ka masarakat, tapi ogé ahli nyepeng kamera, ngatur lapangan, jeung… ngurus salaki di imah. Lengkep pisan, kawas paket komplit promo akhir taun. 😄
Isuk-isuk, nalika ibun masih nempel dina daun cau, Ketua KIM geus siap nyusun rencana: “Dinten ieu kedah ngadokumentasikeun kagiatan warga, nyieun video, ngedit, tuluy diunggah.” Tapi saméméh indit, aya hiji tugas mulya nu teu bisa kaliwat: nyiapkeun sarapan kanggo salaki. Cenah mah, lamun berita bisa telat saeutik, tapi lamun sarapan telat, bisa aya “demo internal di dapur”.
Sanggeus urusan dapur beres, kamera disangigirkeun, hape dicas pinuh, sareng semangat dikencengkeun. Di lapangan, anjeunna jadi wartawan dadakan: motrét, ngarekam video, wawancara warga, bari sok nyelipkeun guyonan sangkan nu direkam teu kagok. Kadang, nalika keur serius ngarekam, aya telepon ti imah: “Bu, sangu na tinggal sabaraha?” Eta ogé bagian tina manajemen krisis versi rumah tangga. 😄
Tanggung jawab nyebarkeun informasi ka warga teu enteng. Informasi kudu leres, gancang, jeung mangpaat. Tapi dina waktos anu sami, mikiran operasional di lapangan ogé teu éléh ribetna: pulsa data, batré kamera, transportasi, nepi ka cuaca nu sok ngadadak robah. Mun hujan turun, lain ukur jaket anu baseuh, tapi ogé rencana bisa bubar jalan.
Sok sanajan kitu, Ketua KIM Rancakalong tetep ngajalankeun pagaweanana pinuh ku kanyaah jeung dedikasi. Anjeunna ngabuktikeun yén jadi pamimpin teu kudu jauh ti kahirupan sapopoe. Bisa tetep jadi istri nu nyaah ka salaki, bari sakaligus jadi motor penggerak informasi di masarakat.
Carita ieu ngingetkeun urang yén di balik video nu rapih, informasi nu gancang sumebar, aya perjuangan leutik nu sok dibarengan ku seuri jeung kaheureuyan. Ketua KIM Rancakalong sanés saukur “ketua”, tapi ogé sutradara lapangan, editor dadakan, bendahara darurat, sarta chef rumahan.
Pokona mah, Rancakalong boga Ketua KIM nu luar biasa: kuat di lapangan, haneut di imah, jeung tetep bisa seuri sanajan jadwal padet. Hatur nuhun kanggo pengabdian anu teu katingali tapi karasa mangpaatna ku balarea. 🙏😄 GM